Wednesday, February 20, 2013
ရှေးဦးစွာ ဘုရားသခင်ရဲ့ ကျေးဇူးတော်ကို ချီးမွမ်းပါတယ်။ ကျွန်မရဲ့ ဒူးခေါင်းက အရမ်းနာတဲ့အတွက် လမ်းလုံးဝ လျှောက်လို့ မရပါဘူး။ လမ်းသွားရင်လည်းပဲ ခွင်ခွင်ပြီး လဲကျပါတယ်။ တနင်္ဂနွေနေ့ ဘုရားကျောင်းရောက်တဲ့အခါ ရှေ့ထွက်ပြီး ဆီလူးဆုတောင်းခံပါတယ်။ အိမ်မှာလည်း ဆုတောင်းပါတယ်။ လုံးဝပျောက်သွားရင် ဘုရားရှေ့ လူရှေ့မှာ သက်သေခံမယ်လို့လည်း ဘုရားသခင်ကို ကတိပေးထားပါတယ်။
အခုဆိုရင် လမ်းလုံးဝလျှောက်လို့ ရသွားပါပြီ။ ဆုတောင်းသံကို နားညောင်းပြီး အံ့သြဖွယ် အဖြေပေးတဲ့ ဘုရားသခင်ရဲ့ ကျေးဇူးတော်ကို ချီးမွမ်းရင်း သက်သေခံပါတယ်။
ဒေါ်မြင့်မြင့်အုန်း (ရွှေပြည်သာ)
Sunday, February 17, 2013
ဒီနေ့ ဖတ်ရှုရတဲ့ နေ့စဉ်ခွန်အား ပါ အကြောင်းအရာလေးက ထိမိလွန်းလို့ ပြန်ပြီး ဝေမျှပေးချင်ပါတယ်။
"အမှုတော်ဆောင်ရန် စွမ်းရည်အမျိုးမျိုး ရှိသော်လည်း၊ လူအသီးသီး၌ရှိသော စွမ်းရည်များကို ပေးတော် မူသော အရှင်ကား တစ်ပါးတည်း ရှိ၏။" (ခေတ်သုံး) ၁ကော ၁၂း၆
လူတိုင်းက ကိုယ့်ကိုကိုယ် အထင်ကြီးတဲ့စိတ်လေး ဝင်သွားတတ်ကြပါတယ်။ ကိုယ့်ရဲ့ လုပ်ငန်းခွင်မှာဖြစ်ဖြစ်၊ စာသင်ခန်းထဲမှာဖြစ်ဖြစ်၊ အသင်းတော်မှာဖြစ်ဖြစ် နေရာအတော်များများမှာ တွေ့ရတတ်ပါတယ်။ တချို့က အလုပ်နည်းနည်းပဲ လုပ်ကြပြီး အချို့က များများလုပ်ကြတယ်။ ကိုယ်လုပ်နိုင်တာရော၊ မလုပ်နိုင်တာရောပါ လုပ်နေကြရတဲ့သူတချို့ရှိတယ်။ အဲလို အလုပ်တွေအများကြီးလုပ်နေရတော့ နေရာတကာ ကိုယ်မပါမပြီး ပုံစံဖြစ်လာပြီး ယိုင်လဲဖို့ဖြစ်လာတယ်။ ကိုယ့်ကိုကိုယ်အထင်ကြီးစိတ်ဝင်လာတတ်တာမျိုးပါ။ ဒီစိတ်လေးကို ဆင်ခြင်နိုင်ဖို့ ဒီနေ့ဖတ်ရှုရတဲ့အကြောင်းအရာလေးက စောင်းပေးပြောပြ ထောက်ပြသွားပါတယ်။ ရောမမြို့ရှိ ပထမရာစုနှစ် အသင်းတော် ရင်ဆိုင်ခဲ့ရတာကို ပုံဥပမာပေးသွားပါတယ်။ အခြားသူများ မလုပ်နိုင်တဲ့အရာကို သူတို့လုပ်နိုင်တဲ့အခါ အချို့သူများက မိမိတို့ ထင်သင့်တာထက် ပိုပြီး မိမိတို့ကိုယ်ကို ထင်ကြတယ် (ရောမ ၁၁း၃)။ ဒါပေမဲ့ ရှင်ပေါလုက "အင်္ဂါအများသည် ဆောင်ရွက်စရာအမှု တစ်ခုတည်းမရှိ" လို့ သတိပေးသွားပါတယ်။ ကျွန်ုပ်တို့တွေဟာ ဘုရားသခင်ရဲ့ ကျေးဇူးတော်သက်သက်ကြောင့် အမျိုးမျိုး ဆုကျေးဇူးတွေကို တစ်ဦးနဲ့ တစ်ဦး မတူညီစွာ ရရှိ ပိုင်ဆိုင်ထားကြပါတယ်။ ဒီဆုကျေးဇူးတွေကို ဘုရားသခင် ပေးအပ်ထားတာဟာ ကိုယ့်ကိုကိုယ် အစေခံဖို့မဟုတ်ဘဲ၊ သူတပါးကို အစေခံဖို့ ပေးအပ်ထား တာသာ ဖြစ်ပါတယ်။ အစေခံရာမှာလည်း ပျင်းရိခြင်း၊ ဖင့်နွဲခြင်းမရှိဘဲ တကယ့်ကို စိတ်ရောကိုယ်ပါ အစေခံဖို့ လိုအပ်တယ်လို့ သတိပေးထားပါတယ်။ အကြောင်းကတော့ ကျွန်ုပ်တို့ဟာ လူ-လူချင်းကို အစေခံနေတာမဟုတ်ဘဲ၊ ဘုရားသခင်ကို အစေခံနေလို့ပဲ ဖြစ်ပါတယ်။ ဒီလိုမျိုးစိတ် အမြဲမွေးဖို့လည်း မှာထားပါတယ်။
ဒါကြောင့်မို့ အခြားသူတွေ ဘာကိုလုပ်တယ်၊ ဘာကိုမလုပ်ဘူး စတာတွေကို ချောင်းကြည့်မနေဘဲ၊ ဘုရားသခင်က ဒီနေ့ သူ့ရဲ့ နိုင်ငံတော်မှာ သင့်ကို ဘယ်လို အသုံးပြုနိုင်တယ်ဆိုတာကိုပဲ ဆင်ခြင်ကြည့်ရှုဖို့ ဖြစ်ပါတယ်။ ကိုယ်တော်က သူအလိုရှိတဲ့အတိုင်း ကျွန်ုပ်တို့ကို ဆုကျေးဇူးတွေ ပေးသနားပြီး ဖြစ်လို့ပါ။ အခြားသူတွေနဲ့ မိမိကိုယ်ကို မနှိုင်းယှဉ်ဘဲ ကိုယ်တော်ဖန်ဆင်းတဲ့ မိမိရဲ့ အရှိအတိုင်းကိုသာ ရောင့်ရဲခြင်းရှိဖို့ ဆုတောင်းအားယူလိုက်ဖို့ မေတ္တာနဲ့ ထပ်ဆင့်ဝေငှလိုက်ရပါတယ်။
ကျွန်မမှာ (၂) နှစ်အတွင်း အကြွေးသိန်း (၁၀၀) ကျော် ရှိပါတယ်။ အကြွေးက အရေးတကြီးပေးရမှာ မဟုတ်တဲ့အပြင် သိန်း (၁၀၀) ကျော်ချေးပေးတဲ့ အစ်မလို ခင်မင်တဲ့မိတ်တွေရဲ့ ယုံကြည်မှုကို ရခဲ့တာလည်း ကျေးဇူးတော်ဖြစ်ပါတယ်။ အကြွေးကြေဖို့ တိုက်ခန်းရောင်းရင်တောင် မကြေပါဘူး။ တိုက်ဟောင်းဖြစ်နေလို့ ဈေးမရတဲ့အချိန်မှာ တိုက်သစ်ပြန်ဆောက်ဖို့ ဖြစ်လာပေမဲ့ ကြိုပြီး ရောင်းရင်လည်း အရစ်ကျ ဖြစ်ပြန်တယ်။
ဝယ်သူလာတဲ့အခါ နှစ်ပုံပေးပြီး တစ်ပုံချန်ပြန်တယ်။ ဘုရားသခင်အလိုတော်ရှိရင် အရစ်ကျလည်း မဟုတ်ဘဲ တစ်ပတ်အတွင်း အမြန်ရောင်းရပြီး ငွေအကြေရဖို့ ဘုရားသခင်ထံတော်မှာ ဆုတောင်းခဲ့ပါတယ်။ အံ့သြဖွယ်ရာ ဘုရားသခင်က အဖြေပေးခဲ့ပါတယ်။ လိုချင်တဲ့ဈေးထက် (၁၅) သိန်း ပိုရတဲ့အပြင် အရစ်ကျလည်း မဟုတ်တဲ့အတွက် ဆုတောင်းသံကို နားညောင်းပြီး အံ့သြဖွယ် အဖြေပေးတဲ့ ဘုရားသခင်ရဲ့ ကျေးဇူးတော်ကို ချီးမွမ်းရင်း သက်သေခံပါတယ်။
ဒေါ်ယေ့နပ် (ခေါ်) သောင်းသောင်း
Tuesday, February 5, 2013
ရှေးရှေးက တပည့်တော်များလည်း စိတ်ဝင်စား၍ "ကိုယ်တော်သည် ကြွလာ၍ ဤကပ်ကမ္ဘာကုန်သော ပုပ္ပနိမိတ်သည် အဘယ်နိမိတ်ဖြစ်မည်ကိုလည်းကောင်း အမိန့်ရှိတော်မူပါ..." ဟု ပူဆာခဲ့ကြပါသည်။ စင်စစ် နောက်ဆုံးသောကာလကို ကျွန်တော်တို့သည် နိမိတ်လက္ခဏာအားဖြင့်သာ သိနိုင်ပါသည်။
အောက်ပါအချက် နိမိတ်ပုပ္ပများက နောက်ဆုံးသောကာလကို ဖော်ပြလျက် ရှိပါ၏။
(၁) လေ့လာသင်ကြားမှု အလွန်တိုးပွားခြင်း။ (ဒံ၊ ၁၂း၎။ မ၊ ၂၄း၁၄)
(၂) သဘာဝဘေးဒုက္ခများ အလွန်များပြားခြင်း။ (မ၊ ၂၄း၇။ လု၊ ၂၁း၂၆)
(၃) ဆိုးယုတ်မှု တိုးပွားပြီး စစ်မက်အင်္ဂါ ထူပြောခြင်း။ (၂တိ၊ ၃း၁-၁၃။ မ၊ ၂၄း၆)
(၄) လိင်တူဆက်ဆံမှု အနှံ့အပြားဖြစ်ပွားခြင်း။ (လု၊ ၁၇း၂၈-၃၀)
(၅) စစ်မှန်သော ယုံကြည်ခြင်းကို စွန့်ပယ်သူများပြားခြင်း။ (၂သက်၊ ၂း၂-၃)
(၆) ခရစ်ယာန်များကို ညှဉ်းပန်းနှိပ်စက်မှုတိုးပွားခြင်း။ (မ၊ ၂၄း၉-၁၀)
စသည်တို့ ဖြစ်ပါသည်။
သခင်ယေရှုက ထိုအကြောင်းအရာအလုံးစုံကို မြင်ရလျှင် လူသားသည် ရောက်လုနီးသည်ကို သိမှတ်ကြလော့ဟု မိန့်တော်မူခဲ့ပါသည်။ ဖော်ပြခဲ့သော နိမိတ်များသည် ယခုအခါ အတော်ပင် ပြည့်စုံလာတာကိုး။
Credit: ဆိုး ပြုစုသည့် ညစဉ်ခွန်အား မှ ကောက်နုတ်ဖော်ပြပါသည်။
Subscribe to:
Posts (Atom)